ახლახანს დაბრუნდა მორიგი გასტროლებიდან ქუთაისის ახალგაზრდული თეატრი. შემოქმედებითი დასი ზურაბ ფხაკაძის ხელმძღვანელობით ამჯერად თურქეთის უდიდეს ქალაქ სტამბულში იმყოფებოდა. სტამბული მსოფლიოს ახალგაზრდულ თეატრებს მთელი აპრილის განმავლობაში მასპინძლობს. ჩვენი თეატრი ამ ფესტივალზე თურქეთის კულტურის საერთაშორისო უნივერსიტეტმა დაპატიჟა. საქართველოს გარდა ფესტივალზე მიწვეული იყო შვედეთის, საფრანგეთის, იტალიისა და მაკედონიის დასები.„ენა ვერ აღწერს იმ სითბოს და ყურადღებას რაც სტამბულში ჩვენ კულტურის უნივერიტეტის სტუდენტებმა გვიჩვენეს. ეს იყო დიდი სიხარულის დღეები და განშორების დიდი სევდაც. თავადაც ცრემლებს ვერ ვიკავებდით, როცა ახალგაზრდებმა გამოგვაცილეს“- განაცხადა ზურაბ ფხაკაძემ.
სტამბულის ფესტივალი საკონკურსოა. შესაბამისად შემოქმედებითი დონეც ძალიან მაღალია. გამარჯვებულებს მაისის დასაწყისში დაასახელებენ. ქუთაისელები იმედოვნებენ,რომ ჩვენი თეატრიც არ დარჩება ჟიურის ყურადღების მიღმა. ჟიურის თავმჯდომარემ ცნობილმა თურქმა მსახიობმა და რეჟისორმა ზაფერ ასლიდადემ თავად ისურვა ცალკე შეხვედროდა ქართულ დასს. მოგვიანებით კი მისი სახელით ქუთაისელები საზეიმო ვახშამზე დაპატიჟეს.
დაველოდოთ ჟიურის გადაწყვეტილებას. თუმცა თავად ქუთაისის ახალგაზრდული თეატრი ამ მოვლენებს ქუთაისში ვერ დაელოდება, რადგანაც თეატრი 3 მაისს ფრანკურტში მიფრინავს. ამჯერად ახალგაზრდულ თეატრს გერმანია 12 მაისამდე უმასპინძლებს.
ბოლო ერთი წლის მანძილზე ქუთაისის ახალგაზრდულმა თეატრმა 5 ჯერ მოახერხა საერთაშორისო გასტროლის მოწყობა. სტამბული მეხუთე იყო ანკარის, ანტალიის, დომინიკის რესპუბლიკისა და აფრიკის სუდანის შემდეგ.
